Atividade Tara Bandu iha Suku Meligo Posto Administrativo Cailaco Municipio Bobonaro

Iha loron 18-21 de Novembro 2025 Ministerio Turismo e Ambiente liu husi Diresaun Nacional Biodiversidade halao atividade Tara Bandu ne’ebe mak halao iha suku Meligo Posto Administrativo Cailaco Municipio Bobonaro. Realizasaun husi atividade ne’e tamba hare ba situasaun iha suku refere mak iha komunidade balun halo atividade ne’ebe mak estraga ambiente, ai horis no animal sira ne’ebe mak existe iha suku refere. Atividade Tara Bandu nee partisipa husi Komunidade sira, Autoridade local, lia nain ho PNTL squadra Cailaco. Posto Administrativo Cailaco iha suco hitu ne’ebe mak sei iha Tara Bandu, nunee iha tempo oin mai sira sei submete tan proposta ba Diresaun Nacional Biodiversidade hodi realiza atividade tara Bandu. Objetivo husi Tara Bandu ida ne’e atu regula komunidade sira ho labele halo atividade Kasa ilegal no fa’an animal fuik sira iha fatuk hun(Niki, Loriku, Pombu local, kakuak, Rusa, lekiraok karau fuik ho fahi fuik) nomos bandu atu uja materia kimiku hodi oho no kaer animal sira iha bee laran hanesan tuna, noek no ikan, bandu seluk mak hanesan Labele raut fatuk no raihenek iha fatin proibido sira. Iha mos sansaun ou multa ba ema ne’ebe mak kontra ou viola regulamento Tara Bandu nee mak sei hetan multa hanesan selu multa karau alin 5, osan dollar Americano $500, fo’os karong 5, sigaru slop ida, malus futun 5, bua kesak 5, tua manas gerigen 5 no tua midar dos 5. Atividade Tara Bandu ne’e halo protesaun ba animal protegida sira nomos halo protesaun ba ambiente iha suku refere.