Haree ba numero asidente komunidade ne’ebe mak hetan ataka husi lafaek(kanek kama’an, grave no lakon moris) ne’ebe maka amenta tinan ba tinan, preukupasaun movimento lafaek ne’ebe mak maka’as ho nune’e mak iha loron 29-30 de Outubro 2025, Ministerio Turismo e Ambiente liu husi Diresaun Nasional Biodiversidade realiza Workshop Dezemvolvimento Programa Jestaun Lafaek iha Timor Leste. Workshop nee realiza servisu hamutuk ho Governo Northern Territory, Governo Australia ho Embaixada Australia iha Timor Leste. Workshop nee loke direita husi Diretor Geral Ambiente Sr. Domingo Mesquita. Objetivu husi Workshop nee mak atu fo konhesimento basico no jeral kona ba oinsa mak jestaun lafaek hanesan Identifikasaun ba tipos lafaek ne’ebe mak existe iha Timor, karakteristika lafaek iha Bee Masin ho Bee Fresku iha Timor Leste, Analize no identifikasaun ba migrasaun lafaek husi Timor ba fatin seluk nomos fatin seluk mai Timor, habitat lafaek nomos oinsa utiliza armadilha hodi kaptura lafaek no seluk tan. Apresentador husi mai husi Governo Northern Territory Australia. Workshop refere mak hanesan : Sr. Robby McLeod, Sr Yusuke Fukuda, Sr. Tony Griffiths, Sr. Kelly ho Sr. David. Partispante husi Workshop nee mai husi funsionario Diresaun Nacional Biodiversidade, Ministerio Agricultura Pekuaria e Pescas, Autoridade Protesaun Civil, Instituisaun PNTL husi Unidade Maritima, Agencia Conservation International ho seluk tan. Workshop nee halao iha Salao Agricultura Ministerio Agricultura e Pescas e Pekuaria Comoro, Dili durante loron rua. Workshop nee hetan atensaun maximo hosi partisipante sira. Hosi Workshop nee hamosu hanoin atu forma Ekipa Integrado Jestaun Lafaek ne’ebe mak mai husi Ministerio Turismo Ambiente, Ministerio Agricultura Pekuaria e Pescas, Autoridade Protesaun Civil, Falintil-FDTL no PNTL hosi Unidade Maritima. Ekipa Integrado Jestaun Lafaek nee tuir plano sei hetan nafatin trainamento husi Parseiro Desemvolvimento sira hanesan Governo Northern Territory nomos Governo Australia.
No comments yet.